Сауран ауданы, Шорнақ ауылдық округіндегі «Әлеуметтік сауда орындарында» жергілікті шаруалар мен кәсіпкерлердің ауыл шаруашылығы өнімдері тұрғындарға төмен бағада ұсынылды. Бұл игі шара халықтың күнделікті тұтынатын азық-түлік өнімдеріне қолжетімділігін арттыруға, әлеуметтік қолдау көрсетуге және жергілікті өндірушілерді ынталандыруға бағытталған. Атап айтқанда, сәбіздің келісі — 180 теңге, сары сәбіз — 350 теңге, қызылша — 180 теңге, пияз — 90 теңге, картоп — 190 теңге, қырыққабат — 180 теңге, асқабақ — 170 теңге, шалғам (редка) — 180 теңгемен сатылымға шығарылды.
Бұл сауда нүктелерінде бағаның қолжетімділігімен қатар, өнімдердің сапасына да ерекше мән берілуде. Тұрғындар таза, балғын және экологиялық тұрғыдан қауіпсіз өнімдерді еш делдалсыз, тікелей өндірушілерден сатып алу мүмкіндігіне ие. Мұндай әлеуметтік жобалар аудан халқының тұрмыс сапасын жақсартуға және отандық ауыл шаруашылығы өнімдерін кеңінен насихаттауға ықпал етеді. Бұл бастама өңірдегі азық-түлік нарығын тұрақтандырып қана қоймай, ауыл шаруашылығымен айналысатын кәсіпкерлердің де табысын арттыруға жол ашады.
Сауран ауданында өткен ауыл шаруашылығы өнімдерінің жәрмеңкесі тұрғындарға үлкен қолдау болды. Бұл шара тек азық-түлік бағаларын төмендетіп қана қоймай, жергілікті өндірушілер мен шаруаларды ынталандыруға, сондай-ақ экологиялық таза өнімдерді халыққа қолжетімді етуге мүмкіндік берді. Жәрмеңкеде ұсынылған өнімдердің сапасы мен бағасы тұрғындар арасында үлкен сұранысқа ие болды. Әлеуметтік қолдау көрсету арқылы бұл жәрмеңке, бір жағынан, халықтың өмір сүру сапасын арттыруға, екінші жағынан, ауыл шаруашылығының дамуына қосымша серпін беруге бағытталған. Мұндай жобалар ауыл шаруашылығын дамытуға әрі тұрғындардың тұтынушылық қабілетін жақсартуға оң ықпалын тигізеді.