Отырар ауданының 90 жылдық мерейтойы дүбірлі ақындар айтысымен жалғасын тапты. Қазақтың көрнекті тұлғалары халық ақыны, Парасат орденінің иегері Әселхан Қалыбекова мен сатирик, халықаралық «Алаш» әдеби сыйлығының лауреаты Көпен Әмірбектің туғанына 75 жыл толуына арналған «Омартасы рухтың – Отырарым» атты республикалық ақындар айтысы өтті.
Түркістан облысы әкімдігінің және «Аманат» партиясының қолдауымен, Отырар ауданы әкімдігінің ұйымдастыруымен өткен бұл рухани іс-шарада еліміздің түкпір-түкпірінен келген танымал айтыскер ақындар бас қосты.
Аудандық мәдениет сарайының фойесінде қылқалам шебері Әділхан Мәліктің шығармашылығынан тақырыптық сурет көрмесі ұйымдастырылып, Отырар өңірінің тарихы мен руханиятынан сыр шертетін құнды жәдігерлер көпшілік назарына ұсынылды.
Аламан айтысты Қазақстан Республикасы Парламенті Мәжілісінің депутаты, Қазақстанның еңбек сіңірген қайраткері, айтыскер ақын Аманжол Әлтай жүргізіп отырды.
Ұлттық өнерімізді ұлықтаған іс-шарада Түркістан облысы мәдениет басқармасының басшысы Әзімхан Қойлыбаев, аудан әкімі Қайрат Жолдыбайұлы, аудандық мәслихат төрағасы Уәлихан Ұзақов құттықтау сөз сөйлеп, ақындарға сәттілік тіледі.
Республикалық додаға еліміздің әр өңірінен келген арқалы ақындар Мақсат Аханов, Алтынгүл Қасымбекова, Бекарыс Шойбеков, Жансая Мусина, Өміржан Көпбосын, Аспанбек Шұғатай, Тұрар Тлеулиев, Мейірбек Сұлтанхан және ауданымыздың жалынды жас ақындары Дәурен Ақсақалов пен Ахметрасул Баянбай қатысып, айтыстың көркін қыздырды.
Айтыс барысында ақындар ел бірлігі, ұлттық рух, Отырардың тарихи тұлғалары мен мәдени мұрасы жайлы терең толғап, Әселхан Қалыбекова мен Көпен Әмірбектің шығармашылық жолын жырларына арқау етті.
Тыңдарман қауым әр айтыс жұбының өнерін зор ықыласпен қабылдап, сахна төрін қошеметке бөледі. Әсіресе жас буын мен тәжірибелі ақындардың арасындағы рухани сабақтастық, елдік пен ерлік туралы термелі жырлар көпшіліктің көңілінен шықты.
Айтысқа қатысқан ақындарға арнайы жүлделер мен қаржылай сыйлықтар табысталды.
«Омартасы рухтың – Отырарым» республикалық айтысы ұлттық өнерді дәріптеу, жас буынға өнеге көрсету және ел руханиятын жаңғырту жолында ерекше маңызға ие шара болды.
Айтыс соңында аудан халқы мен қонақтар ұлттық өнерге деген құрметін білдіріп, Отырардың 90 жылдық мерейлі мерекесіне арналған салтанатты кешті зор ықыласпен қорытындылады.
Бұл республикалық ақындар айтысы – Отырар ауданында ұлттық өнердің өркендеуіне үлкен серпін берген әрі мәдениеттің маңыздылығын көрсеткен маңызды шара болды. Айтыс барысында әр ақын өзінің тыңдармандарын терең мазмұнды жырларымен сусындатты, ел бірлігі мен ұлттық рухты жоғары дәрежеде насихаттады. Әселхан Қалыбекова мен Көпен Әмірбектің шығармашылығы айтысқа ерекше бағыт беріп, олардың өмірлік жолы мен шығармашылық мұрасы жас ұрпаққа үлгі болды.
Бұл айтыс қазақтың дәстүрлі өнерін жаңғырту мен оның маңыздылығын ұлықтауға үлкен үлес қосып, рухани сабақтастықты көрсетті. Жас ақындардың тәжірибелі өнерпаздармен бірге сахнаға шығуы – олардың ұлттық өнерге деген құрметін арттырып, болашақта айтыс өнерін дамытудың бір жолы болып табылады. Қоғамдық құндылықтарды, елдіктің қадірін арттырудағы мұндай іс-шаралар әрқашан маңызды рөл атқарады.
Айтыстың әрбір сәті тыңдармандарға рухани күш беріп, елдің тарихы мен мәдениетін кеңінен тануға мүмкіндік берді. Отырардың 90 жылдығына арналған осындай үлкен ауқымды іс-шаралар ауданның мәдени өміріне жаңа серпін беріп, оның әлеуметтік-мәдени дамуына оң әсерін тигізуде. Құрметті ақындар мен өнерсүйер қауым әр айтысқа ерекше құрметпен қарап, ұлттық өнерді дәріптеудің маңыздылығын түсінді.