Түркістан облысы, Келес ауданында құрылыс саласында ауқымды жұмыстар атқарылды. Ауданда жаңа тұрғын үйлер, әлеуметтік нысандар мен мәдениет ошақтарының құрылысы қарқын алып, жоспарланған көрсеткіштер толық орындалды. Жыл басынан бері ауданда бірқатар әлеуметтік нысан пайдалануға берілді. Атап айтқанда, Абай ауылында заманауи спорт кешені, Біртілек ауылында 300 орындық, ал Ғ.Мұратбаев және Абай ауылдарында 600 орындық жайлы мектептер ел игілігіне берілді.
Одан бөлек, Абай ауылында 2 қабатты, 8 пәтерлі 22 тұрғын үй бой көтеріп жатыр. Қазіргі таңда құрылыстың екінші қабаты аяқталып, шатыр жабу жұмыстары жүргізілуде. Бұл үйлер келер жылы ел игілігіне беріледі деп күтілуде.
Мәдениет саласында да жаңа нысандардың құрылысы қолға алынды. Жүзімдік ауылдық округінің орталығында 149 орындық мәдениет үйі, Абай ауылында жаңа буынды дамыту орталығы мен мұражайдың құрылысы жүріп жатыр. Бұл нысандардың құрылысы 2026 жылы аяқталады.
Сонымен қатар ауыл тұрғындары үшін қолайлы жағдай жасау мақсатында 6 елді мекенде жаңа медициналық пункттердің құрылысы басталды. Атап айтқанда, Бесқұбыр, 1-Мамыр, Көлтоған, Игілік, Достық және Атақоныс ауылдарында медициналық нысандар бой көтеруде.
Білім беру саласында 6 елді мекенде жаңа мектеп салу жобалары дайындалған. Сонымен қатар жастардың бос уақытын тиімді өткізу мен спортты дамыту мақсатында 4 ауылда спорт зал, ал Мақташы ауылында ұлттық спорт түрлеріне арналған кешеннің құрылысы жоспарланып отыр. Ошақты ауылында ангар типті спорт залының құрылысы да осы айда басталмақ.
Аудан аумағында заңсыз құрылысқа қарсы жұмыстар жүйелі жүргізіліп келеді. Нәтижесінде, 9 нысан бойынша заңбұзушылық анықталып, тиісті шаралар қолданылды.
Келес ауданындағы құрылыс жобаларының жүзеге асырылуы тек әлеуметтік қажеттіліктерді қанағаттандырып қана қоймай, ауыл тұрғындарының өмір сапасын да айтарлықтай жақсартуға мүмкіндік береді. Жаңа мектептер, спорт кешендері мен мәдениет үйлері салу арқылы тұрғындар үшін мәдени, білім беру және спорттық инфрақұрылымдардың қолжетімділігі артуда. Бұл жоба аясында, әсіресе жастар мен балаларға арналған сапалы білім мен спорттық қызметтерді ұсыну, олардың болашағына бағытталған маңызды қадам болып табылады.
Сонымен қатар, ауданның әлеуметтік инфрақұрылымын дамыту аясында жүргізілген жұмыс жаңа жұмыс орындарының ашылуына да ықпал етті. Медицина саласында ауылдарда жаңа медициналық пункттердің құрылысы мен ауылдық жерлерде халыққа медициналық көмек көрсетудің сапасын арттыру бағытында қолға алынған шаралар тұрғындардың денсаулығын нығайтуға жағдай жасап отыр. Бұл өзгерістер жергілікті тұрғындардың өмір сүру деңгейін жақсартуға бағытталған нақты қадамдар болып табылады.
Құрылыс саласындағы атқарылып жатқан жұмыстардың нәтижесінде Келес ауданы тұрғындары жаңа мүмкіндіктер мен ыңғайлы жағдайлармен қамтамасыз етілуде. Алдағы уақытта бұл жобалардың аяқталуы ауданның әлеуметтік және экономикалық дамуына қосымша серпін береді. Құрылыс жұмыстарындағы жүйелілік пен сапа, заңсыз құрылысқа қарсы қабылданған шаралар, осындай жобалардың тиімді жүзеге асуын қамтамасыз етіп отыр.