Мемлекет басшысы Қасым-Жомарт Тоқаев өз Жолдауларында елдің цифрлық теңсіздігін жоюды, барлық азаматты сапалы интернетпен қамтамасыз етуді тапсырған болатын. Осы тапсырма аясында Келес ауданындағы шалғай елді мекендерді интернет желісімен қамту бағытында жүйелі жұмыстар жүргізілуде. Бүгінде Келес ауданының Тартоғай елді мекенінде «Қолжетімді интернет» ұлттық жобасы аясында заманауи OneWeb спутниктік жүйесі орнатылып, іске қосылды.
Ұлттық жоба аясында тартоғайлық 118 тұрғын енді сапалы әрі тұрақты интернет желісін пайдалану мүмкіндігіне ие болды. Бұл жоба Түркістан облысының цифрландыру, мемлекеттік қызметтер көрсету және архивтер басқармасы мен «Jusan Mobile» АҚ-ның бірлескен жұмысының нәтижесінде жүзеге асты.
OneWeb спутниктік байланысы арқылы енді Тартоғай ауылының тұрғындары онлайн білім алу, мемлекеттік қызметтерді электронды форматта пайдалану, және интернет арқылы кәсіп ашу мүмкіндігіне қол жеткізеді.
Бұл жоба ауыл тұрғындарының цифрлық мүмкіндіктерін арттыру мен ақпараттық теңсіздікті жоюда маңызды қадам болып табылады. Бұрын шалғай елді мекендерде интернет желісінің болмауы тұрғындардың түрлі қызметтерді алуына кедергі келтіріп, өмір сапасын төмендеткен еді. Енді, Тартоғай ауылының 118 тұрғыны OneWeb спутниктік жүйесі арқылы сапалы интернетке қол жеткізіп, заман талабына сай онлайн білім алу және цифрлық қызметтерді пайдаланудың жаңа мүмкіндіктеріне ие болады.
Жалпы, бұл бастама цифрландыру саласындағы үлкен жетістік болып саналады, себебі интернетке қол жеткізуге мүмкіндігі жоқ ауылдарда мемлекеттік қызметтер мен онлайн кәсіпкерлік мүмкіндіктері кеңейеді. Бұл өз кезегінде ауылдың әлеуметтік-экономикалық дамуына ықпал етіп, жастардың білім алуында, азаматтардың күнделікті тіршілігінде үлкен өзгерістер әкеледі. Сонымен қатар, Түркістан облысының цифрландыру және мемлекеттік қызмет көрсету басқармасы мен «Jusan Mobile» АҚ-ның бірлескен жұмысы осы жобаның сәтті жүзеге асуына негіз болған.