Түркістан облысында туризм саласына ерекше назар аударылып, оның дамуы үшін нақты қадамдар мен жоспарлар қолға алынуда. Салаға инвесторларды тарту, өңірдегі тарихи және киелі орындарды жүйелеу, сондай-ақ туристік соқпақтарды көбейту мақсатында кешенді жұмыстар жүргізілуде. Бұл жұмыстар өңірдің туристік тартымдылығын арттырып, экономиканы әртараптандыруға септігін тигізеді.
Осы орайда, Түркістан облысының әкімі Нұралхан Көшеров «Бәйдібек қаған» қоғамдық қорының өкілдерімен арнайы кездесу өткізіп, өңірдегі туризм саласының дамуын талқылады. Кездесу барысында Бәйдібек ауданының туризм саласына инвестиция тарту, киелі орындар мен кесенелердің маңын абаттандыру, сондай-ақ жаңа туристік нысандар мен инфрақұрылымдарды дамыту мәселелері қаралды. Сонымен қатар, ауданға туристер мен зияратшылар үшін қонақүй салу және туристік инфрақұрылымды жақсарту бойынша ұсыныстар айтылды. Әкім өз тарапынан жауапты тұлғаларға тиісті тапсырмалар беріп, ұсыныстарды бақылауға алуды тапсырды.
Түркістан облысының туризм саласына инвестиция тарту бойынша атқарылған жұмыстар нәтижелі болып отыр. 2025 жылдың алғашқы жартыжылдығының қорытындысы бойынша облыстың туризм саласында оң көрсеткіштерге қол жеткізілді. Орналастыру орындарының саны артып, демалыс аймақтары мен сауықтыру кешендерінің қызметтері кеңейтілген. Бұл өзгерістер туристер легінің артуына себеп болды. Биылғы жартыжылдықта орналастыру орындарында 151 мың турист демалып, өткен жылдың сәйкес кезеңімен салыстырғанда 7%-ға өсім байқалды.
Сондай-ақ, 2025 жылдың 8 айының қорытындысы бойынша Түркістан облысының табиғи аумақтарына 123,2 мың адам келген, бұл өткен жылдың дәл осы кезеңімен салыстырғанда 29,5%-ға жоғары көрсеткіш. Өңірдегі тарихи орындарға 736,3 мың адам саяхаттап, бұл өткен жылдың тиісті кезеңімен салыстырғанда 7%-ға артып отыр. Бұл көрсеткіштер Түркістан облысының туристік әлеуетін одан әрі арттырудың оң белгісі болып табылады.
Қосымша атап өтетін жайт, туризм саласындағы негізгі капиталға тартылған инвестиция көлемі биыл 36,9 миллиард теңгеге жетіп, өткен жылдың тиісті кезеңімен салыстырғанда 36,4%-ға артқан. Бұл облыстың туристік инфрақұрылымын дамытуға бағытталған ауқымды қаржының ағымдағы жылда тиімді жұмсалғанын көрсетеді.
Осылайша, Түркістан облысы туризм индустриясын дамыту үшін жүйелі түрде жұмыс жасап, инвестиция тарту, жаңа туристік нысандар салу және инфрақұрылымды жақсарту арқылы өз әлеуетін арттыруды мақсат етіп отыр. Бұл бағытта алдағы жылдары да маңызды жобалар мен бастамалар жүзеге асырылып, облысқа туристердің келу санының одан әрі артуына ықпал ететін болады.
Түркістан облысындағы туризм саласының қарқынды дамуы өңір экономикасының жаңа көздерін ашуға мүмкіндік береді. Бұл бағытта атқарылып жатқан жұмыс нәтижесінде жергілікті тұрғындар үшін жаңа жұмыс орындары пайда болып, бизнес өкілдері үшін жаңа мүмкіндіктер туып отыр. Сонымен қатар, өңірдің табиғи және тарихи ерекшеліктері, киелі жерлері мен мәдени мұрасы туристік тартымдылықты арттыра отырып, елімізде ғана емес, халықаралық деңгейде де Түркістанды танымал етуге мүмкіндік береді.
Алдағы уақытта аймақтың туристік әлеуетін толыққанды іске асыру үшін заманауи инфрақұрылым мен сервис сапасын көтеру, жаңа туристік бағыттарды дамыту, сондай-ақ цифрлық технологияларды енгізу жоспарлануда. Мұндай өзгерістер тек экономикалық тұрғыдан ғана емес, сонымен қатар өңірдің мәдени және әлеуметтік жағдайына да оң әсерін тигізетіні сөзсіз. Түркістан облысының туризм саласын дамыту бағытындағы жұмыстың нәтижесінде аймақтың халықаралық аренадағы бәсекеге қабілеттілігі одан әрі артатын болады.