«Самғау» оңалту орталығының құрылғанына бір жыл толуына орай, «Өмірді сүйген жүректер» тақырыбында салтанатты іс-шара ұйымдастырылды. Шара барысында Республика күніне орай, орталықтың бір жыл ішіндегі жетістіктері мен атқарылған жұмыстары таныстырылып, арнаулы әлеуметтік қызмет алушылар мен орталық мамандарының қатысуымен концерттік бағдарлама көрермен назарына ұсынылды.
Іс-шараға Түркістан облысының жұмыспен қамтуды үйлестіру және әлеуметтік бағдарламалар басқармасы басшысының орынбасары Самат Байғұтов, Түркістан облыстық мәслихатының депутаты Инара Намазбаева, Сауран аудандық іскер әйелдер қауымдастығының өкілдері, әлеуметтік сала мамандары мен бұқаралық ақпарат құралдарының өкілдері қатысты. Шараның ресми бөлігінде мекеме директоры Гүлнұр Сауртаева атқарылған жұмыс барысы туралы баяндады.
Сондай-ақ, қонақтар назарына қызмет алушылардың түрлі бағыттағы емдік-сауықтыру және әлеуметтік бейімдеу жұмыстарының нәтижелері арнайы бейнеролик арқылы көрсетілді. Қатысушылар ерекше жандардың өмірге деген құштарлығын, жігері мен табандылығын сезініп орталық ұжымының еңбегіне табыс тіледі.
Орталық ашылған уақыттан бері 160 қызметкер мүмкіндігі шектеулі жандарға сапалы оңалту қызметтерін көрсетіп, олардың әлеуметтік белсенділігін арттыруға бағытталған кешенді жұмыстар атқарып келеді. Бір жыл ішінде 1200-ге жуық қызмет алушы емдік және психологиялық оңалту шараларынан өтіп, өмір сапасын жақсартуға мүмкіндік алды.
Айта кетейік, Түркістан облысында 100 мыңға жуық мүмкіндігі шектеулі жан тұрады. Бұл облыс халқының 5%-ын құрайды. Сауран ауданы Оранғай ауылында орналасқан орталықта 18 жастан асқан мүгедектігі бар адамдарға арналған. 200 орындық заманауи оңалту орталығында арнаулы әлеуметтік қызметтердің 8 түрі көрсетіледі.
Іс-шара барысында қызмет алушылардың әлеуметтік бейімделуі, физикалық және психологиялық жағдайын жақсартуға бағытталған нақты нәтижелер мен жетістіктер атап өтілді. Қатысушылар орталықтың бір жыл ішіндегі еңбегіне жоғары баға беріп, оның мүмкіндігі шектеулі жандардың өміріне қосқан үлесін ерекше атап өтті. Түркістан облысында осындай орталықтардың болуы әлеуметтік инфрақұрылымның маңызды бөлігіне айналып, осал топтардың әлеуетін арттыруға үлкен ықпал етуде.
Бұл жобаның әлеуметтік маңызы зор, себебі ол мүмкіндігі шектеулі азаматтардың қоғаммен байланысын нығайтып, олардың өз-өзіне деген сенімін арттырады. «Самғау» орталығының мамандары көрсеткен кәсіби қолдау мен көмек арқылы көптеген адамдар өздерінің әлеуметтік тұрмыстарын жақсарта алды. Сонымен қатар, орталық қызметкерлері мен әртүрлі қоғамдық ұйымдардың өзара ынтымақтастығы нәтижесінде мүгедектігі бар жандардың қоғамға интеграциялануы жеңілдей түсуде.
Болашақта мұндай оңалту орталықтарының санын көбейту және оларды одан әрі жетілдіру арқылы мүмкіндігі шектеулі адамдардың өмір сапасын арттыру бағытындағы жұмыстар жалғасатын болады.
Алдағы уақытта «Самғау» орталығының қызмет аясы кеңейтіліп, мүмкіндігі шектеулі жандарға арналған жаңа жобалар іске асырылмақ. Бұл жобалар әлеуметтік қолдау көрсетудің жаңа тәсілдерін енгізу, арнайы мамандандырылған жаттығу залдары мен оңалту бағдарламаларын қосымша ұсыну арқылы азаматтардың жеке даму мүмкіндіктерін арттыруды көздейді. Орталықтың ұжымы тек физикалық емес, психоэмоционалды сауықтыруды да басты назарда ұстап, қызмет алушылардың қоғамда толыққанды өмір сүруіне септігін тигізуде. Сонымен қатар, бұл орталық басқа өңірлерге үлгі болып, мүмкіндігі шектеулі азаматтар үшін жаңа мүмкіндіктер жасау жолында ел көлемінде маңызды қадамдар жасалатыны сөзсіз.