Түркістан облысында 2025 жылы автомобиль жолдары саласын дамыту мақсатында 1 235,6 шақырым жол мен көшелерге құрылыс-жөндеу жұмыстары жүргізіледі деп жоспарланған. Жыл қорытындысымен 951,4 шақырымы пайдалануға беріледі деп көзделуде. Бұл жайында Түркістан облысының жолаушылар көлігі және автомобиль жолдары басқармасының басшысы Қуатжан Жұматаев БАҚ өкілдерімен өткен брифингте мәлімдеді.
«Қазіргі таңда облыстық маңызы бар 225,2 шақырым жолдың құрылыс-жөндеу жұмыстары жүріп жатыр. Одан бөлек, аудандық маңызы бар 130,7 шақырым көшеге, елді мекендердегі 885,6 шақырым жолға жөндеу жұмыстары жүргізілуде. Сондай-ақ, «Ауыл – ел бесігі» бағдарламасы аясында 140 елді мекенде жалпы ұзындығы 395,5 шақырым көшеде құрылыс жұмыстары жүргізіледі. Биыл жыл қорытындысымен жергілікті маңызы бар жолдардың жақсы және қанағатты жағдайдағы үлесін 94,7%-ға жеткізу жоспарланған. Құрылыс жұмыстарының сапасы «Ұлттық жол активтері сапасы орталығы» РМК ТО филиалының тұрақты бақылауында» — деді спикер.
Түркістан облысында жол жөндеу және инфрақұрылымдық жаңғырту жұмыстары ауқымды қарқынмен жүзеге асырылуда. Бұл бағытта жүзеге асырылып жатқан жобалар тек облыстың көлік жүйесін жетілдіріп қана қоймай, тұрғындардың тұрмыс сапасын арттыруға да септігін тигізеді. Жолдардың сапасын көтеру, қауіпсіздік шараларын нығайту, заманауи технологияларды қолдану өңірдің әлеуметтік-экономикалық дамуына оң ықпал етеді. Облыстың әртүрлі елді мекендерінде ауқымды құрылыс жұмыстары жүріп, халықтың қолайлы өмір сүруіне қажетті жағдайлар жасалуда. Жобалардың сапасы мен тиімділігі әлі де маңызды мәселе болып қалатындықтан, барлық жұмыстар қатаң бақылауға алынып, нәтижелі түрде жүзеге асырылуда.
Сонымен қатар, басқарма тарапынан қаржыландыруды қажет ететін 4 көпір және жалпы ұзындығы 132,6 шақырымдық 7 жолды күрделі жөндеуден өткізу жобасы әзірленіп, сараптама қорытындысы алынған. Одан бөлек, жаңадан 33,4 шақырым жолға жоба әзірленуде. Айта кетерлігі, Түркістан облысы аумағында автоматтандырылған өлшеу станцияларын орнатуға 7 жол аймағы белгіленген. 2024-2025 жылдары Арыс қаласындағы Арыс-Темірлан, Арыс-Қабылсай жолдарына орнатылды. Биыл Сайрам ауданында Қарамұрт-Ақсукент автомобиль жолының бойына 2 жерге аталған станцияны орнатуға қаржы қаралды. Қазіргі таңда мердігер мекеме анықталып, жұмыстар басталған.
Жол жөндеу жұмыстарын жалғастыру, инфрақұрылымды жақсарту және көлік қатынасын дамыту – Түркістан облысының алдағы кезеңдегі басты міндеттерінің бірі. Осы шаралар арқылы өңірдің ішкі байланыстарын нығайтып, экономиканың өсуін қамтамасыз ету көзделуде. Келесі жылдары да инфрақұрылымдық жобаларға бөлінетін қаржы көлемі артып, жолдардың сапасы мен пайдалануға берілу мерзімдері барынша қатаң бақылауда болады.
Тұрғындардың көлік қатынасынан туындайтын мәселелерді шешу және жергілікті жолдардың жағдайын жақсарту, сондай-ақ жаңа жобалармен толықтыру өңірдің әлеуметтік және экономикалық дамуын арттыруға септігін тигізеді. Алдағы уақытта аймаққа жаңа заманауи технологияларды енгізу мен жаңғырту жұмыстарының ауқымын ұлғайту арқылы Түркістан облысының жол инфрақұрылымының деңгейін халықаралық стандарттарға сай ету көзделуде.