2025 жылы Қазақстан халқы Ассамблеясының құрылғанына 30 жыл толады. Осы мерейлі датаға орай Парламент Мәжілісінің депутаты Темір Қырықбаев пен Жетісай ауданының әкімі Серік Мамытов «AMANAT» партиясы Жетісай аудандық филиалында қоғамдық-саяси біртұтастықты сақтау, бірлік пен татулықты насихаттау ісінде белсенділік танытып жүрген этномәдени бірлестік өкілдерімен жүздесті.
Жүздесу барысында этносаралық татулық пен келісім Қазақстанның баға жетпес байлығы екені айтылып, этносаралық және конфессияаралық татулықты бұзатын кез келген әрекеттің конституциялық емес деп танылатынын, этнос өкілдері арасында құқықбұзушылықтардың алдын алу жайы талқыланды.
Бірлікке үндеген жиында, аудан тұрғындары, соның ішінде түрлі этнос өкілдері арасында ұлттар мен ұлыстардың достығын, ынтымақтастығын дәріптеу, азаматтық-құқықтық тәрбие және қазақ халқының тарихы мен салтын, тілін сүю және құрметтеуге, этностардың салт-дәстүрлерін сақтауға үндеу мақсатында ауданда атқарылып жатқан жұмыстарға жоғары бағасын беріп, қатысушыларды ҚР Ассамблеясының 30 жылдық мерекесімен құттықтады.