2026 жылдың 1 ақпанынан бастап балалар ұйымдарына мемлекеттік бақылаудың жаңа түрі енгізіледі. Жаңа бақылау жүйесі жазалауға емес, алдын алуға, қауіпсіздікті қамтамасыз етуге және балалардың денсаулығын қорғауға бағытталған. Бұл туралы брифингте Түркістан облысының санитариялық-эпидемиялогиялық бақылау департаменті басшысының орынбасары Асқар Ысқақов мәлімдеді.
«Заң нормаларына сәйкес, мемлекеттік бюджет есебінен қаржыландырылатын балалардың тамақтануын, медициналық қызметпен қамтылуын, білім алуын, тәрбиесі мен сауықтырылуын қамтамасыз ететін ұйымдар ерекше бақылау нысандары ретінде мемлекеттік бақылау мен қадағалаудың жаңа тетігі аясында тексерілетін болады. Заң аясында «Халық денсаулығы және денсаулық сақтау жүйесі туралы» кодекске бақылау мен қадағалаудың ерекше тәртібі енгізіледі. Өзгерістер жоспарлы тексерулер және мониторинг арқылы бақыланады. Алғашқы тексеру кезінде айыппұл салынбайды. Бірақ, нақты мерзімі көрсетілген бұзушылықты жою үшін нұсқама беріледі. Нұсқама орындалмаған жағдайда жоспардан тыс тексеру жүргізіледі. Қазіргі таңда заңның толық іске асуын қамтамасыз ететін нормативтік-құқықтық актілер әзірленуде» — деп баяндады спикер.
Жаңа бақылау жүйесі балалар ұйымдарының жұмысын тиімді реттеп, олардың сапасын арттыруға бағытталған маңызды қадам болып табылады. Мұнда басты назар балалардың қауіпсіздігі мен денсаулығын қорғауға аударылған. Алдын алу шараларын күшейту арқылы балалардың өміріне қауіп төндіретін жағдайлардың алдын алу көзделіп отыр. Бұл шаралар балалар ұйымдарының сапалы жұмыс істеуін қамтамасыз етіп, ата-аналар мен қоғамның сенімін нығайтады. Жүйелі тексерулер мен мониторинг балалар ұйымдарының жұмысын үнемі бақылауда ұстауға мүмкіндік береді. Жаңа тетік балаларға көрсетілетін қызметтерді тексеріп қана қоймай, сонымен қатар қызмет көрсетушілердің жауапкершілігін арттыруға ықпал етеді. Бұл шаралар балалардың құқықтарын қорғауды күшейтеді және ұйымдардың өз міндеттерін дұрыс орындауына жағдай жасайды. Сонымен қатар, өзгерістер балалар ұйымдарының тұрақты түрде дамуына, олардың қызметтерінің сапасын арттыруға көмектеседі.