Халқымыздың ұлы батыры Бауыржан Момышұлы «Ұстаздық – ұлы құрмет, себебі, ұрпақтарды ұстаз тәрбиелейді. Болашақтың басшысын да, данасын да, ғалымын да, еңбекқор егіншісін де, кеншісін де ұстаз өсіреді, Өмірге ұрпақ беретін аналарды қандай ардақтасақ, сол ұрпақты тәрбиелейтін ұстаздарды да сондай ардақтауға міндеттіміз» деген. Бала бойына ата-анадан кейінгі ақыл-ой, адамгершілік, әдептілік, ар-ұят, ұлттық сана-сезімді сіңіруші адам – мұғалім.
Жетісай қаласындағы «Алпамыс батыр» атындағы №8 жалпы орта мектебінде «Мұғалімдер күні» мерекесіне арналған салтанатты жиынға Жетісай ауданының әкімі Серік Мамытов пен аудандық білім бөлімі басшысының м.у.а Шоқан Адайбеков, аудандық мәслихат аппаратының басшысы Сакен Досымов пен аудандық қоғамдық кеңес төрағасы Бақыт Жаңбырбаев, аудандық ардагерлер кеңесінің төрағасы Махамбет Айтбай мен Түркістан облысы білім басқармасының мамандары Зүбайра Алтаева, Лаура Медетова мектеп директорлары, мұғалімдер мен ардагер ұстаздар қатысты.
«Ұстаз – қай заманда болмасын қоғам дамуының негізгі тетігі саналатын қасиетті де қастерлі мамандық. Өйткені, мұғалімнің берер білімі мен өнегесінсіз адам баласының жеке тұлға ретінде қалыптасуы, мемлекеттің әлеуметтік-экономикалық дамуы, тарих пен тағылымды оқып білуі әсте мүмкін емес. Міне, сондықтан да болар соңғы жылдары елімізде педагогика саласының мамандарына мемлекет тарапынан ерекше қамқорлықтар жасалып, мәртебесін биіктету шаралары қызу қолға алынған. Ұстаздар мен оқушылардың заман үдерісінен шеттеп қалмай өз бетінше ізденуіне, білімі мен біліктілігін арттыруына мүмкіндігінше жағдай жасалып, білім ошақтарының материалдық-техникалық базалары жақсаруда. Нәтижесінде, білім мен ғылымға қызығушы қазақстандықтардың қатары артқан» деген аудан әкімі құрметті мамандық иелерін кәсіби мерекелерімен құттықтап, ыстық лебізін білдірді.
Заман талабына сай әр баланың қабілетіне қарай дарындылығын дамытып, дүбірлі білім жарыстарында жүзден жүйрік, мыңнан тұлпар шәкірт шығарып жүрген ұлағатты жандардың ерен еңбектері ескеріліп сый-құрметке бөленді. Биіктерді бағындырып, білім бәсекесіне қабілетті шәкірттерді тәрбиелеп жүрген 170-ке жуық тәжірибелі ұстаз аудан әкімі Серік Үсенұлының, аудандық мәслихат төрағасы Медет Қасымов пен «AMANAT» партиясы Жетісай аудандық филиалының атқарушы хатшысы Асқар Қайназаровтың, аудандық білім бөлімі басшысының м.у.а Шоқан Адайбековтың алғыс хаттарымен марапатталды. 22 ұстаз білім саласының жоғары марапаты «Ы.Алтынсарин» медалінің иегері атанды.
Салтанатты шара барысында аудан өнерпаздары мен мектеп оқушылары концерттік бағдарламаларын ұсынып, көпшілікке мерекелік көтеріңкі көңіл-күй сыйлады. Әуелете ән салып, күмбірлете күй төкті. Мың бұрала би билеп, Жетісай аспанын шаттыққа бөледі.
Ұстаздар күнімен Жетісай ауданының әкімі Серік Үсенұлы Мамытов аудан ұстаздарын құттықтады:
«Қазаны ортаймаған қазан айының басында жыл сайын елімізде «Ұстаздар күні» аталып өтеді.
Өйткені, ұстаз – ең қадірлі, ең мерейлі әрі аса жауапты мамандық иесі. Ұрпақ тәрбиесі жолында өлшеусіз қызмет етіп келе жатқан мұғалім еңбегінің орны да бөлек, дәрежесі де жоғары. Шәкірттерінің болашақтағы жетістіктері, табысы мен іскерлігі тікелей әу бастағы тәлімгеріне байланысты. Шәкірттерін білім нәрімен сусындатып, тәлім-тәрбие, жақсы қасиеттерді бойына дарытып, адамгершілік рухта бағыт-бағдар беру ісінде ұстаздың еңбегі орасан. Сондықтан да олар әрдайым қасиетті тұлға ретінде ерекшеленеді.
«Ұстаздық – ұлық емес, ұлы қызмет. Себебі, ұрпақтарды ұстаз тәрбиелейді. Болашақтың басшысын да, данасын да, ғалымын да, еңбекқор егіншісін де, кеншісін де ұстаз өсіреді… Өмірге ұрпақ берген аналарды қандай ардақтасақ, сол ұрпақты тәрбиелейтін ұстаздарды да сондай ардақтауға міндеттіміз» деген қазақтың батыр ұлы Бауыржан Момышұлы айтқандай, білім көшін жылжытып келе жатқан ұстаздар қауымына көрсетілер құрмет жыл өткен сайын арта бермек! Сіздердің бүгін еккен дәндеріңіз ертеңгі жеңісті – жемісті күннің кепілі. Ұстаз болашақ азаматтарды ғана емес, бүкіл болашақ қоғамды қалыптастырады. Осындай жолы мен жөні бөлек аяулы ұстаздарымыз – шәкірттерінің мақтанышы ғана емес, бүкіл ел мақтанышы!
Осы орайда ел баласына білім беріп, тағылымды тәрбие дарытып келе жатқан баршаңызды кәсіби мерекелеріңізбен шын жүректен құттықтаймын!
Сіздерге өскелең ұрпақ тәрбиелеудегі өрелі жұмыстар және мемлекеттің гүлденуі жолындағы абыройлы істеріңізге толағай табыстар тілеймін! Қызығы мен шыжығы қатар жүретін ұстаздық жолдарыңыз тек өрлеу мен өсуге бастасын! Тәуелсіз еліміздің дамуына қосып келе жатқан еңбектеріңіз үшін баршаңызға шексіз алғыс білдіремін!» делінген құттықтауда.