Кентау қаласының 70 жылдық мерейтойына орай «Кентауым — мәуелі гүл бағым» атты дәстүрлі ақындар айтысы өтті. Бұл өнер додасында еліміздің түкпір-түкпірінен келген 16 танымал айтыскер ақын өзара бақ сынасты. Жыр додасында Кентау қаласының әкімі Жандос Тасов қатысушыларға сәттілік тілеп, ұлттық өнерді ұлықтаудың және рухани құндылықтарды дәріптеудің маңыздылығын атап өтті.
Қазылар алқасы құрамында ҚР мәдениет қайраткері Әбілхаир Сыздықов, Қазақстан Журналистер одағының мүшесі Ләззат Сарыбаева, ҚР мәдениет саласының үздігі Бекмұрат Анарбаев, ақын, дәстүрлі әнші-термеші Аязбек Рүстамов, сондай-ақ облыстық мәдениет басқармасының бөлім басшысы Мұқағали Кенжетайұлы болды. Қазылар айтыскерлердің тапқырлығына, суырыпсалмалық қабілетіне және көркемдік шеберлігіне баға берді. Жыр сайысында ақындар Кентау қаласының жетістіктерін, жастар тәрбиесі мен руханият тақырыптарын жырлап, шеберліктерін көрсетті.
Нәтижесінде сөз додасында бас жүлдеге Бекарыс Шойбеков ие болды. Жүлделі 1-орынға Нұрмат Мансұр, 2-орынға Дидар Қами мен Ақмарал Леубаева, 3-орынға Нұрзат Қару, Сезімхан Шұғайып, Дәурен Ақсақалов және Нұрдаулет Өмірбек ие болды. Сонымен қатар, ұлттық өнерді дәріптеу мақсатында бірнеше арнайы аталымдар бойынша марапаттар мен ақшалай сыйлықтар табыс етілді.
Кентау қаласының 70 жылдығына орай ұйымдастырылған ақындар айтысы – ұлттық мәдениетімізді насихаттап, жас ұрпаққа рухани құндылықтарды жеткізудің маңызды бір жолы болды. Ақындардың тапқырлығы мен өнеріне тәнті болған көрермендер бұл шараның маңыздылығын жоғары бағалады. Әсіресе, жергілікті және республикалық деңгейдегі ақындардың қатысуы айтыстың мазмұнын байытты, ал өнерді ұлықтау шарасы Кентау қаласының мерейтойына ерекше мән берді. Айтыс барысында қаланың жетістіктері мен жастар тәрбиесі туралы айтылған жырлар тыңдармандарды бейжай қалдырмады.
Айтыс – қазақтың мәдениеті мен рухани болмысын сақтауда маңызды рөл атқаратын өнер түрі. Кентау қаласындағы бұл айтыс жас ұрпаққа ұлттық өнердің құндылықтарын ұғындыру, оны насихаттау үшін таптырмас алаң болды. Осындай шаралар арқылы жастарға қазақ әдебиеті мен поэзиясын насихаттап, олардың шығармашылық тұрғыда дамуына үлес қосуға мүмкіндік береді.
Сонымен қатар, Кентау қаласының 70 жылдық мерейтойы аясында өткен айтыс қаланың мәдени өміріне зор серпін берді. Бұл шара тек қана айтыскер ақындардың шығармашылықтарын көрсетуге ғана емес, сонымен бірге қала тұрғындарын бір мақсатқа жұмылдыруға да септігін тигізді. Мерейтойлық шаралар қаланың мәдени, әлеуметтік дамуына ықпал етіп, оның тарихында елеулі оқиға ретінде қалары сөзсіз.
Келешекте мұндай дәстүрлі өнер шараларын өткізуді жалғастырып, ұлттық өнерді насихаттауды күшейту қажет. Қоғамның әрбір мүшесі осы сияқты маңызды оқиғаларға белсене қатысып, өз үлесін қосса, мәдениеттің жаңғыруына және оның болашақта дамуына үлкен үлес қосары анық.