Түркістандағы «Рәміздер» алаңында 25 қазан – Республика күніне арналған Мемлекеттік туды көтеру салтанаты өтті. Іс-шара Қазақстан Республикасының Мемлекеттік Әнұранын орындаудан басталып, көк байрақ желбіреді.
Салтанатты жиынға Түркістан облысының әкімі Нұралхан Көшеров, өңірдің құрметті азаматтары, жастар және қала тұрғындары қатысты. Мемлекет басшысы Қасым-Жомарт Тоқаевтың бастамасымен еліміздің барлық өңірінде Республика күніне арналған мемлекеттік туды көтеру рәсімі дәстүрге айналған. Сол игі бастама қасиетті Түркістан төрінде де жалғасын тапты.
– Баршаңызды 25 қазан – Республика күнімен шын жүректен құттықтаймын! Мемлекет Басшысы Қасым-Жомарт Тоқаев Республика күніне ұлттық мереке мәртебесін қайтару туралы бастама көтеріп, ол жүзеге асты. Жыл сайын Республика күні Президентіміз Ту көтеру рәсімін өткізеді. Бұл іс-шара республиканың барлық өңірінде өз жалғасын табады. Міне, бүгін осы мақсатта өздеріңізбен Түркістан төрінде жүздесіп тұрмыз. Биыл 1990 жылы 25 қазанда қабылданған декларацияға биыл 35 жыл толып отыр. Бұл декларация еліміздің тәуелсіздік алуына жол ашқан маңызды құжат болды. Бүгінде тәуелсіз еліміз тұрақты дамып келеді. Елдігіміз мәңгі болсын! Көк байрағымыз әрдайым көкте желбіреп, еліміздің мәртебесі биіктей берсін! – деді облыс әкімі Нұралхан Көшеров.
Түркістандықтар бұл мерекені жоғары деңгейде атап өтіп, мемлекеттік рәміздерді құрмет тұту дәстүрін жалғастырды. Мерекелік шара аясында концерттік бағдарлама ұйымдастырылып, отансүйгіштікке тәрбиелейтін әндер шырқалды.
Айта кетейік, Түркістандағы ту тұғырының биіктігі – 62,5 метр, байрақтың ені –12 метр, ұзындығы – 24 метр.
Мемлекеттік ту – елдіктің белгісі, азаттықтың айбары. Мемлекеттік рәміздерді қастерлеу – отаншылдықтың көрінісі.
Жиынның маңызы жыл өткен сайын артып келеді. Түркістан қаласындағы мемлекеттік ту тұғырының биіктігі мен байрақтың өлшемдері айрықша назар аударады. Осы сәтте көк байрақтың жоғары көтерілуі көпшіліктің патриоттық сезімін оятып, елдің бірлігі мен ынтымағын нығайтуға септігін тигізеді. Мемлекеттік рәміздер – әрбір азаматтың жүрегінде елге деген сүйіспеншілік пен құрметтің белгісі. Мұндай шаралар тек елдің тәуелсіздігі мен болашағына деген сенімді арттырып қана қоймай, ұрпақтар арасында ұлтжандылық сезімін қалыптастыруда маңызды рөл атқарады.
Қазіргі таңда еліміздің барлық өңірлерінде Республика күніне арналған осындай салтанаттар өткізілуі – тұтас ұлттың рухани жаңғыруының жарқын көрінісі. Мұндай іс-шаралар халқымыздың тарихына деген құрметті арттырып, әрбір азаматтың өз елінің жетістіктері мен болашағына қосқан үлесін сезінуіне мүмкіндік береді. Түркістан қаласындағы іс-шараның жоғары деңгейде өтуі де өңірдің мәдени және рухани дамуына оң ықпал ететіні сөзсіз.
Тәуелсіз Қазақстанның азаттығы мен еркіндігін мақтан тұтып, елдің рәміздерін қастерлеу – әр азаматтың қасиетті міндеті. Бұл күні барша халықтың бірлігі мен күш-жігері ортақ мақсатқа бағытталғанын тағы бір мәрте көрсетеді. Осылайша, Республика күні еліміздің мемлекеттілігін нығайтып, тұтастығын сақтау жолындағы маңызды қадамдардың бірі болып табылады.