Бүгін Түркістан қаласында толық жаңғыртудан өткен «Парасат» саябағы жұртшылыққа есігін ашты. Салтанатты шараға арнайы қатысқан Түркістан облысының әкімі Нұралхан Көшеров көпшілікті құттықтап, жылы лебізін білдірді.
– Алдымен, баршаңызды келе жатқан Республика күнімен шын жүректен құттықтаймын! Еліміздегі ең ұлық мереке қарсаңында Түркістанда тағы бір қуанышты сәтте жолығып тұрмыз. Биыл Мемлекет басшысының бастамасымен Түркістан қаласының ерекше мәртебесі туралы заң қабылданды. Осы Заң аясында Түркістанға қолдау күшейтіліп, шаһардың туристік әлеуеті артуда. Соның айқын көрінісі – жаңарған «Парасат» саябағы. Аталған саябақты қайта реконструкциялау жұмыстары 2023 жылы басталып, бүгінде толық жаңартылып, ел игілігіне беріліп отыр. Жаңарған саябақ қала тұрғындары мен қонақтарына сапалы қызмет көрсете берсін! – деген облыс басшысы халыққа қолайлы орта жасау бағытындағы жұмыстар өз жалғасын табатынын жеткізді.
Нұралхан Оралбайұлы саябақтағы футбол алаңшасында жасөспірімдермен кездесіп, жас спортшыларға доптар табыстады. Саябақ аумағын аралап көрді.
«Парасат» саябағын реконструкциялау жұмыстарын Түркістан қаласы әкімдігі құрылыс бөлімінің тапсырысымен «Өнім» ЖШС атқарды. Жалпы аумағы 14 гектарды қамтитын саябақта тұрғындардың қауіпсіз әрі жайлы демалысы үшін барлық жағдай жасалған. Мұнда 2 мыңнан астам ағаш отырғызылып, заманауи жарықшамдар мен 100-ден астам орындық орнатылды. 7 мың шаршы метр аумаққа асфальт төселіп, балаларға арналған ойын алаңшалары, футбол, баскетбол және теннис алаңдары, веложолақтар мен жаяу жүргіншілерге арналған жолдар, сондай-ақ, жазғы сахна мен демалыс аймақтары қарастырылған. Салтанатты шара концерттік бағдарламаға ұласып, тұрғындарға мерекелік көңіл-күй сыйлады.
Саябақтың жаңартылуы Түркістанның мәдени және әлеуметтік өмірін жандандыруға бағытталған маңызды қадам болып табылады. Бұл жобаның жүзеге асуы қала тұрғындары мен туристер үшін сапалы және қауіпсіз демалыс орнының пайда болуына мүмкіндік туғызды. Түркістанның тарихи және мәдени маңызы артып келе жатқанын ескерсек, «Парасат» саябағының жаңаруы қаланың туристік инфрақұрылымын дамытуға зор үлес қосатындығы сөзсіз. Саябақта жүргізілген қайта құру жұмыстары жоғары стандарттарға сай орындалған, әрі табиғи ортаға зиян келтірмей, заманауи қажеттіліктерді ескере отырып жасалған.
Бұл жаңғырту жұмыстарының бір бөлігі ретінде қала әкімдігі мен жергілікті кәсіпкерлердің ынтымақтастығы айқын көрінеді. Түркістандағы бұл секілді жобалар өңірдің экономикалық өсімін қолдайды және әлеуметтік инфрақұрылымды жақсартуға ықпал етеді. Қала тұрғындарының уақытын тиімді әрі жайлы өткізуі үшін осындай маңызды орындардың көбеюі, қала өмірінің әртүрлі салаларындағы өзгерістерді айқындайды. Алдағы уақытта Түркістанның тағы да бірнеше қоғамдық орындары жаңартылып, қала тұрғындары үшін қолайлы жағдайлар жасалатын болады.