23 маусым – Мемлекеттік қызметшілер күні кәсіби мерекесі аясында Мақтаарал ауданында салтанатты іс-шара өтті. Жыл сайын бұл күнде әрбір мемлекеттік қызметшінің еңбегі бағаланып, олардың қоғамдағы маңызы атап өтіледі.
Мақтаарал ауданының әкімі Бақыт Асанов қатысқан шарада белсенді еңбек етіп жүрген бір топ мемлекеттік қызметшілерге арнайы алғыс хаттар берілді. Оның ішінде Түркістан облысының әкімі Нұралхан Көшеровтың грамотасымен ауданның сәулет, қала құрылысы және құрылыс бөлімінің басшысы Бижан Анарбеков марапатталды.
Әкім Бақыт Асанов мемлекеттік қызметтің маңызды әрі жауапты екенін, осы салада қызмет ететін мамандардың ауданның дамуы мен халықтың әл-ауқатын көтеруге қосқан үлестері зор екенін атап өтті. Ол мемлекеттік қызметшілердің кәсіби шеберлігі мен адалдығын жоғары бағалап, алдағы уақытта да Мақтаарал ауданын дамыту жолында табысты қызмет етулеріне тілектестік білдірді.
Сонымен бірге, аудан әкімі аудандағы барлық мемлекеттік қызметшілерге құттықтау жолдады.
«Құрметті мемлекеттік қызмет саласының ардақты өкілдері және ардагерлері! Сіздерді кәсіби мерекеміз – 23 маусым, Мемлекеттік қызметшілер күнімен шын жүректен құттықтаймын!
Мемлекеттік қызмет – бұл үлкен жауапкершілікті, біліктілік пен сабырлылықты, жоғары тәртіп пен азаматтық ұстанымды талап ететін маңызды сала. Сіздердің күнделікті атқарып жатқан жұмыстарыңыз – қоғам мен мемлекет арасындағы алтын көпір. Сіздер халық пен билік арасындағы сенімді байланысты қамтамасыз етіп, азаматтардың қажеттіліктеріне дер кезінде үн қатып, ел дамуына өз үлестеріңізді қосып келесіздер.
Бүгінгі мереке – адал еңбектің, табандылықтың, кәсіби шеберліктің және азаматтарға қалтқысыз қызмет етудің мерекесі. Сіздердің әрқайсыңыз өз жұмыстарыңыз арқылы өңіріміздің өркендеуіне, халықтың әл-ауқатын арттыруға сүбелі үлес қосып келесіздер. Қызметтегі мұқияттылық, тәртіп, әділдік пен ашықтық – сіздердің басты қағидаларыңыз.
Біз дамыған, әділетті әрі заманауи мемлекет құру жолында алға нық қадам басып келеміз. Бұл жолда мемлекеттік қызметшілердің еңбегі ерекше маңызды. Мемлекеттік басқару жүйесін жетілдіру, мемлекеттік қызметті цифрландыру, ашықтық пен халықпен кері байланысты нығайту – осының барлығы сіздердің тікелей қатысуларыңызбен жүзеге асуда.
Құрметті әріптестер! Осы айтулы күні сіздерге зор денсаулық, отбасылық амандық, мол бақыт, қажымас қайрат пен еңбекте толағай табыстар тілеймін! Әр күніңіз халыққа адал қызмет етудің биік мұратынан айнымай, ел сенімін ақтаумен өтсін. Мемлекеттік қызметтегі тәжірибелеріңіз молайып, кәсіби биіктерге көтеріле беріңіздер!».
Іс-шара барысында аудандық мәслихаттың хатшысы Қадір Сәрсекбаев та мемлекеттік қызметшілерге алғыс хаттарын табыстады. Ол өз сөзінде мемлекеттік қызметшілердің қоғамдағы орны ерекше екенін, олардың атқаратын міндеттерінің маңызы зор екенін атап өтті.
Мемлекеттік қызметшілер күніне арналған салтанатты шара соңында концерттік бағдарлама ұйымдастырылып, қатысушыларға көтеріңкі көңіл-күй сыйлады. Жергілікті өнерпаздар мемлекеттік қызметшілерге арналған ән-жырларымен келушілердің ыстық ықыласына бөленді.