Шардара ауданының Ұзын ата ауылдық округінде Республика күні аясында және ауылдың 55 жылдық мерейтойына орай «Нұрман» шаруа қожалығының күріш өңдеу цехының ашылу салтанаты өтті. Салтанатты шараға Шардара ауданы әкімінің орынбасары Жұмасұлтан Бердешов, «АMANAT» партиясы Шардара аудандық филиалының төрағасы Ережеп Бекет, ауыл әкімі Ғани Есімханов, сондай-ақ ауыл тұрғындары қатысты.
Ашылу салтанатында аудан әкімінің орынбасары Жұмасұлтан Бердешов пен ауыл ақсақалы Сламбек Мергенбаев жаңа цехтың лентасын қиып, кәсіп иесіне сәттілік тіледі. Жеке кәсіпкер Дәурен Нұрманның жетекшілігіндегі шаруа қожалық бүгінде 420 гектар алқапқа күріш егіп, гектарына орта есеппен 70 центнерден өнім алған. Жалпы 3000 тоннаға жуық күріш жинап отыр. Өнімнің сапасы жоғары «Лазер» және «Атаман» түрлері өсірілген. Цехта ауылдың 15 адамы тұрақты жұмыспен қамтылған.
Цехтың ашылуы ауыл тұрғындары үшін үлкен жаңалық болып табылады. Бұл жаңа кәсіпорынның ашылуы тек қана ауылдың әлеуметтік-экономикалық жағдайын жақсартуға ықпал етіп қана қоймай, қосымша жұмыс орындары құруға да мүмкіндік береді. Қазіргі таңда ауыл тұрғындары үшін тұрақты жұмыс табу оңай емес, ал бұл жобаның іске қосылуы олардың тұрақты табыс көзін арттырып, жаңа мүмкіндіктер ашады.
Жалпы, ауыл шаруашылығын дамыту еліміз үшін маңызды басымдықтардың бірі болып табылады. Мұндай өндіріс орындарының ашылуы ауыл шаруашылығы өнімдерін өңдеу секторын дамытуға және экспорттық әлеуетті арттыруға ықпал етеді. Шардара ауданында күріш өсіру мен өңдеу дәстүрі терең, сондықтан бұл қадам аймақтағы ауыл шаруашылығын жаңа деңгейге көтеруге үлкен серпін бермек.
Сонымен бірге, «Нұрман» шаруа қожалығы өндірісті кеңейтуді және жаңа өнім түрлерін шығару жоспарларын да қолға алуда. Бұл ауылдың экономикалық тұрақтылығын нығайтып, жергілікті тұрғындардың әл-ауқатын арттыруға елеулі әсерін тигізеді. Цехтың сәтті жұмыс істеуі мен табысты дамуы ауылдың болашағын жарқын етуге мүмкіндік береді.
Алдағы уақытта осындай бастамалар өңірде ауыл шаруашылығының даму қарқынын жеделдетіп, жаңа кәсіпкерлік мүмкіндіктерін ашуға ықпал етеді. Сонымен қатар, Шардара ауданының ауыл шаруашылығы өнімдерін өңдеу және шығару саласындағы жетістіктері еліміздің басқа өңірлеріне үлгі болып, ауылдық аудандарда экономикалық даму мен жұмыс орындарын ашудағы басты модельге айналуы мүмкін.