Мемлекет басшысы Қасым-Жомарт Тоқаевтың бастамасымен «25 қазан – Республика күні» мерекесі болып бекітілген болатын. Мемлекеттің қалыптасу тарихы ұлықталып, өткеннің өнегесін өскелең ұрпаққа насихаттайтын мерекені Жетісай ауданының жұртшылығы да жоғары дәрежеде атап өтті. Салтанатты мереке аясында Жаңа ауыл ауылдық округіне қарасты Атақоныс елді мекеніндегі мәдениет үйі пайдалануға берілді.
1957 жылы қолданысқа берілген мәдениет үйіне 2014 жылы ағымдағы жөндеу жүргізілген. Биылғы жылдың мамыр айында 0,9346 шаршы метр аумаққа басталған күрделі жөндеу жұмыстарының жалпы құны 342 млн 805 мың теңгені құраған.
Өндірістік кестеге сәйкес жұмыстарды межеленген уақытта аяқтаған «Намыс» ЖШС мердігер мекемесі мәдениет үйін мерекеде ел игілігіне тапсырып отыр. Жаңартылған кешенде мәдениет үйінің қызметкерлерімен қатар ауылдық кітапхана, спорттың бірнеше түрінен үйірмелері жұмыс істейтін болады.
Қолөнер бұйымдары мен кітап, сурет көрмесі жұртшылық назарына ұсынылған мерекелік шараға аудан әкімі Серік Мамытов пен аудандық мәслихат төрағасы Медет Қасымов, «AMANAT» партиясы Жетісай аудандық филиалының төрағасы Асқар Қайназаров, еңбек ардагерлері мен жергілікті тұрғындар, құқық қорғау органдарының өкілдері мен жергілікті мәслихат депутаттары, зиялы қауым өкілдері, сан саланың үздіктері қатысты.
Сонымен қатар, мерекелік іс-шарада аудандық мәслихат төрағасы Медет Қасымов пен «AMANAT» партиясы Жетісай аудандық филиалының төрағасы Асқар Қайназаровтың арнайы алғыс хаттары табыс етілді.
Мемлекеттік тарихымыздың мерейлі мерекесі болған Республика күні мерекесінің салтанатты бөлімінен соң аудан өнерпаздарының мерекелік концерттік бағдарламасы көпшілікке көтеріңкі көңіл-күй сыйлады. Патриоттық әндерден шашу шашылып, Жетісай аспанын ұлттық құндылықтармен көмкерді.
Бұл мереке Жетісай ауданында өткен жылдардағы жетістіктерді бағалап, ұлттың рухын көтерген маңызды оқиға болды. Жаңа ауылдағы Атақоныс елді мекеніндегі жаңартылған мәдениет үйі – бұл тек ғимараттың жаңартылуы емес, ауыл тұрғындарының мәдени тұрмысын жаңа деңгейге көтеру бағытындағы қадам. Жаңа мүмкіндіктерді ашатын бұл орталық жастардың өнерін шыңдауға, кітап оқуды насихаттауға, мәдени іс-шаралар мен спорттық белсенділікті арттыруға ықпал ететін болады. Бұл ғимараттың ашылуы – жергілікті тұрғындардың мәдени өміріне үлкен серпін берді.
Сондай-ақ, мемлекет тарапынан көрсетілген қолдау мен аудан әкімдігінің ұйымшылдығының арқасында бұл үлкен шара жоғары деңгейде ұйымдастырылды. Бұл – Жетісай ауданының өркендеуі мен дамуына қосылған тағы бір қомақты үлес. Жаңартылған мәдениет үйі тек Атақоныс елді мекенінің ғана емес, бүкіл ауданның мәдени орталығы бола алады. Оған ауылдық кітапхана мен спорттық үйірмелердің қосылуы мәдениеттің кең ауқымды таралуына жағдай жасайды.
Бұл күні сондай-ақ, аудандық мәслихат төрағасы мен «AMANAT» партиясы өкілдерінің алғыс хаттарымен марапаттау шарасы ұрпақтар сабақтастығының, елдің қоғамдық өміріне қосқан үлестің маңызды екенін тағы да бір мәрте дәлелдеді. Республика күні мен жаңа мәдениет үйінің ашылуы – аудан тұрғындарының бірлігі мен патриотизмін нығайтуға, жалпы алғанда, Жетісай ауданын дамытуға зор ықпалын тигізетін мерекелік оқиға болып қалды.