Бүгін Қазығұрт аудандық мәдениет сарайында 23 маусым — Қазақстан Республикасының Мемлекеттік қызметшілер күніне арналған салтанатты мерекелік шара өтті. Бұл күн — халық игілігі үшін аянбай еңбек етіп жүрген мемлекеттік қызметшілердің кәсіби шеберлігі мен жауапты қызметіне құрмет көрсету күні.
Салтанатты жиынға аудан әкімі Азизхан Азимханұлы Исмаилов арнайы қатысып, аудан көлемінде мемлекеттік қызмет саласында табанды еңбек етіп келе жатқан қызметкерлерді төл мерекелерімен құттықтап, “Мемлекеттік қызмет — үлкен жауапкершілікті, жоғары кәсіби біліктілікті, өз ісіне деген адалдық пен халыққа қалтқысыз қызмет етуді талап ететін абыройлы міндет. Ауданымыздың тұрақты дамуы, тұрғындардың әлеуметтік мәселелерінің уақытылы шешілуі және өңірдің өркендеуі — сіздердің күнделікті атқарып отырған еңбектеріңіздің жемісі. Мемлекеттік қызметкердің ең басты ұстанымы — заң талаптарын сақтай отырып, халықтың сенімін ақтау. Сіздердің осы жолдағы қажырлы еңбектеріңізге алғыс айтамын. Еңбектеріңіз табысты, абыройларыңыз асқақ болсын, — деді”.
Мерекелік іс-шара барысында аудан әкімдігіне қарасты ауыл округтері, түрлі бөлімдер мен мекемелерде еңбек етіп жүрген бірқатар сала үздіктері мен озат қызметкерлердің еңбегі ерекше атап өтіліп, аудан әкімінің және аудандық мәслихаттың алғыс хаттарымен марапатталды. Сондай-ақ, мемлекеттік қызметке жаңадан қабылданған жас мамандар салтанатты түрде ант қабылдады.
Шара соңы концерттік бағдарламаға ұласып, мәдениет үйінің өнерпаздары мерекелік көңіл-күй сыйлады. Ал, Мемлекеттік қызметшілер күні — ел дамуының сенімді тірегіне айналған, мемлекет пен халық арасындағы алтын көпір қызметін атқаратын мамандардың кәсібилігін дәріптейтін мерейлі мереке.