Бүгін Түлкібас ауданында 23 маусым – Мемлекеттік қызметшілер және Полиция қызметкерлерінің кәсіби мерекесіне орай салтанатты жиын өтті. Шараға аудан әкімі Асқар Естібаев пен аудандық мәслихаттың төрағасы Серғали Сәрсенбаев арнайы қатысып, қос саланың қызметкерлерін айтулы күнмен құттықтады.
Мерекелік жиында аудан басшысы Асқар Сұлтанұлы:
«Мемлекетке қызмет ету – ең құрметті әрі аса жауапты міндет. Мемлекеттік қызметшілер – мемлекеттің айнасы, халықпен тығыз байланыста жұмыс істейтін негізгі буын. Ал полиция – ел тыныштығы мен қауіпсіздігінің тірегі. Сіздердің адал еңбектеріңіз бен кәсіби біліктіліктеріңіз ел дамуына тікелей ықпал етуде», – деп атап өтті.
Жиын барысында аудан әкімдігі мен мәслихат атынан сала үздіктеріне арнайы Құрмет грамотасы мен Алғыс хаттар табыс етілді.
Мемлекеттік қызметтің әр тармағында аянбай еңбек етіп жүрген азаматтарға көрсетілген құрмет – олардың адал қызметіне берілген әділ баға екені сөзсіз.
Жиын соңында полиция қызметкерлерінің қоғам қауіпсіздігін сақтаудағы рөлі ерекше аталып, құқық қорғау органдарының өкілдеріне де зор алғыс пен жылы лебіздер жолданды.