Келес ауданында Мемлекеттік қызметшілер күніне арналған салтанатты іс-шара өтті. Аталған шара мемлекеттік басқару жүйесінің негізін құрайтын сала мамандарының еңбегін бағалау, олардың қоғамдағы рөлін арттыру мақсатында ұйымдастырылды.
Салтанатты жиын барысында аудан әкімі Жәнібек Ағыбаев мемлекеттік қызметтің маңыздылығына тоқталып, аудан тұрғындарына сапалы қызмет көрсетіп келе жатқан қызметкерлерге алғысын білдірді. Сонымен қатар, мемлекеттік қызметшілерге кәсіби адалдығы мен жоғары жауапкершілігі үшін алғыс айтып, қызметтеріне табыс тіледі.
Мемлекеттік қызметшілер күніне орай әртүрлі деңгейдегі марапаттар табысталды. Атап айтқанда, бірқатар қызметкерлер Түркістан облысы әкімінің Грамотасы мен Алғыс хатына, Қазақстан Республикасы Мемлекеттік қызмет істері агенттігінің Түркістан облысы бойынша департаменті басшысының және Келес ауданы әкімінің, сондай-ақ аудандық мәслихат төрағасының Алғыс хаттарына ие болды.
Бұл марапаттар аудандағы мемлекеттік қызметкерлердің кәсіби шеберлігін, адалдығы мен елге деген қызметін бағалаудың нақты көрсеткіші болды. Іс-шара соңында марапат иелеріне құрмет көрсетіліп, естелік суреттерге түсті.
Сонымен бірге, Келес ауданының әкімі Жәнібек Ағыбаев ауданның мемлекеттік қызметшілерін мерекелерімен құттықтады: «Құрметті мемлекеттік қызметшілер!
Сіздерді кәсіби мереке – Мемлекеттік қызметшілер күнімен шын жүректен құттықтаймын!
Мемлекеттік қызмет – бұл ел мен халық алдындағы үлкен жауапкершілік пен адалдықты талап ететін абыройлы міндет. Сіздердің қажырлы еңбектеріңіздің арқасында мемлекетіміздің әлеуметтік-экономикалық дамуы қамтамасыз етіліп, халықтың әл-ауқатын арттыруға бағытталған бастамалар сәтті жүзеге асуда.
Әрбір азаматтың мүддесін қорғап, заң мен әділеттілікті басшылыққа алып қызмет ету – Сіздер сияқты білікті, іскер әрі адал мамандардың қолынан ғана келеді. Сіздердің кәсібиліктеріңіз бен табандылықтарыңыз – мемлекетіміздің мызғымас тірегі.
Осы мерейлі күні баршаңызға зор денсаулық, отбасы амандығын, еңбектеріңізге табыс пен сәттілік тілеймін. Елімізге адал қызмет етіп, халықтың сенімінен шығуға жазсын!, делінген құттықтауда.