Сауран ауданында Қазақстан Республикасы Мемлекеттік қызметшілер күніне арналған салтанатты жиын болып өтті. Шараға мемлекеттік қызметшілер, аудандық мәслихат депутаттары мен мекеме басшылары қатысты.
Жиынды Сауран ауданы әкімі аппаратының басшысы Бекзат Абубакиров пен аудандық мәслихат депутаты Хуршид Шарапов құттықтау сөздерімен ашып, мемлекеттік қызметтің маңызын, мемлекеттік қызметшілердің қоғам алдындағы жоғары жауапкершілігін атап өтті. Сондай-ақ, мемлекеттік қызмет саласында жемісті еңбек етіп жүрген бірқатар қызметкерге аудан әкімі мен аудандық мәслихат төрағасының алғыс хаттары табыс етілді.
Сонымен қатар, Мемлекеттік қызмет істері агенттігінің Түркістан облысы бойынша департамент басшысы Абылайхан Наурызбаевтың атынан да бірқатар мемлекеттік қызметші алғыс хатпен марапатталды.
Салтанатты шара аясында ауданның бірқатар жас мемлекеттік қызметшілері Қазақстан Республикасының мемлекеттік қызметшісінің антын қабылдады. Олар мемлекеттік қызметтің жоғары мәртебесі мен жауапкершілігін терең түсініп, туған халқының игілігі үшін адал еңбек етуге салтанатты түрде ант берді. Жас мамандардың бұл маңызды қадамы мемлекеттік қызметке деген құрмет пен сенімнің айқын көрінісі болып, қатысушылардың зор қошеметіне бөленді.
Шара соңында мәдениет үйінің өнерпаздары арнайы дайындалған концерттік бағдарлама ұсынып, мерекелік көңіл-күй сыйлады. Жиналғандар мемлекеттік қызметкерлердің қажырлы еңбегі әрқашан жоғары бағаланатынын атап өтіп, бір-біріне толағай табыс пен жетістіктер тіледі.
Сонымен бірге, Сауран ауданының әкімі Мақсат Таңғатаров ауданның мемлекеттік қызметшілеріне мерекеге орай құттықтау жолдаған болатын: «Құрметті мемлекеттік қызметшілер!
Сіздерді 23 маусым — Мемлекеттік қызметшілер күнімен шын жүректен құттықтаймын!
Бұл мереке — мемлекеттік басқару ісіне адал еңбек етіп, еліміздің дамуы мен халықтың әл-ауқатын арттыруға өлшеусіз үлес қосып келе жатқан әрбір мемлекеттік қызметшінің беделі мен мәртебесін айғақтайтын күн. Сауран ауданында бүгінде 175 мемлекеттік қызметші еңбек етіп, өңіріміздің әлеуметтік-экономикалық дамуына зор үлес қосып келеді.
Әрбір мемлекеттік қызметшінің кәсіби өсуі — ортақ жетістіктің кепілі. Осы мақсатта ауданымызда мемлекеттік қызметке алғаш қабылданған мамандар 120 сағаттық қайта даярлау курсынан өтсе, әр 3 жыл сайын мемлекеттік қызметшілердің біліктілігін арттыру жұмыстары жүргізіліп тұрады. Осы бағыттағы жүйелі жұмыстар мемлекеттік аппараттың заман талабына сай бейімделуіне, кәсіби машық пен тәжірибесін үздіксіз жетілдіруіне зор мүмкіндік береді.
Мемлекет басшысы Қасым-Жомарт Тоқаев: «Халыққа қалтқысыз қызмет ету — әрбір мемлекеттік қызметшінің басты міндеті», — деп атап өткен болатын. Осы сөз әрбір мемлекеттік қызметшінің кәсіби ұстанымы болып қалуы тиіс деп есептеймін.
Құрметті әріптестер!
Ел мүддесін қорғау, халыққа қалтқысыз қызмет ету — біздің ортақ міндетіміз. Осы жолда көрсеткен адалдығыңыз, жоғары жауапкершілігіңіз бен тәжірибеңіз үшін зор алғысымды білдіремін. Сіздерге зор денсаулық, отбасыларыңызға бақ-береке, еңбек жолдарыңызға толағай табыс тілеймін!
Мерекелеріңіз құтты болсын!», делінген құттықтауда.